გერმანიის კანცლერი ფრიდრიხ მერცი, საფრანგეთის პრეზიდენტი ემანუელ მაკრონი და დიდი ბრიტანეთის პრემიერ-მინისტრი კირ სტარმერი კიევში ჩავიდნენ.

ვიზიტის შესახებ პოლიტიკოსებმა ინფორმაცია სოციალურ ქსელში გაავრცელეს.

ეს მერცის პირველი ვიზიტია უკრაინაში, მას შემდეგ, რაც ოფიციალურად გახდა გერმანიის კანცლერი.

უკრაინის დედაქალაქში მერცს, მაკრონს და სტარმერს შეუერთდება პოლონეთის პრემიერ-მინისტრი დონალდ ტუსკი და ოთხივე უკრაინის პრეზიდენტ ვოლოდიმირ ზელენსკის შეხვდებიან.

„ჩვენ კიევში ვიდგებით უკრაინასთან სოლიდარობის ნიშნად „რუსეთის მიმდინარე შემოჭრის ფონზე“, – დაწერა მერცმა სოციალურ ქსელში.

მან ასევე დაადასტურა, რომ ოთხივე ქვეყანა მხარს უჭერს აშშ-ის პრეზიდენტის, დონალდ ტრამპის ინიციატივას ომში 30-დღიანი ზავის შესახებ.

„აშშ-თან ერთად ჩვენ მოვუწოდებთ რუსეთს, დათანხმდეს ცეცხლის სრულ და უპირობო 30-დღით შეწყვეტას, რათა შეიქმნას სივრცე სამართლიანი და მყარი მშვიდობის შესახებ მოლაპარაკებებისთვის. ჩვენ მზად ვართ, მხარი დავუჭიროთ სამშვიდობო მოლაპარაკებებს, რაც უნდა დაიწყოს რაც შეიძლება მალე ცეცხლის შეწყვეტის ტექნიკური განხორციელებისა და ყოვლისმომცველი სამშვიდობო შეთანხმების მომზადების მიზნით“, – განაცხადა გერმანიის კანცლერმა.

მისივე თქმით, ვიდრე რუსეთი მუდმივ ცეცხლის შეწყვეტაზე არ დათანხმდება, კიევის დახმარება და რუსეთის სამხედრო მანქანაზე ზეწოლის გაძლიერება გაგრძელდება.

ცნობისთვის, დღეს უკრაინაში ე.წ. მსურველთა კოალიციის შეხვედრა გაიმართება. „მსურველთა კოალიციაში“ დაახლოებით 30 სახელმწიფო შედის.

ავტორი: ექსპრესნიუსი,